Սերժ Սարգսյանը վախեցած է. Պետրոս Մակեյան (տեսանյութ)
Իրավապաշտպան Ժաննա Ալեքսանյանը համոզված է՝ Սերժ Սարգսյանի անունը պետք է դրվի Ալիեւների երկրի պես երկրների նախագահների կողքին. «Բացահայտ ամբողջ ժողովրդի աչքի առաջ կեղծ ապօրինի դատավճիռ կայացնելու, անմեղ մարդկանց բանտերում փակելու համար: Սա արտառոց իրավիճակ է Հայաստանի համար»,- ասում է Ժաննա Ալեքսանյանը: Նրա խոսքերով՝ եթե 2008 թ մարտի 1-ին Ռոբերտ Քոչարյանը զանգվածային ձերբակալություներով է հայտնի, ապա հիմա կալանավայրերը լցվել են անմեղ մարդկանցով, «Երեկ նա ասել էր, որ սերունդներ է դաստիարակելու, մեծ կարծիք ունի իր մասին: Սերունդներին նրա նախագահության օրոք բացի կեղծիքից, երկրի վարկանիշը զրոյի հավասարեցնելուց այլ բան ասել հնարավոր չէ»: Դատավարության ողջ ընթացքին հետեւող «Ժողովրդավարական հայրենիք» կուսակցության նախագահ Պետրոս Մակեյանը համարում է անձնական վրեժխնդրություն. «Սերժ Սարգսյանի վրեժխնդրությունն է բոլոր այն քննադատություններին, հրապարակումներին, բացահայտումներին, բնութագրերը, որ տալիս էր ռեժիմին: Սերժ Սարգսյանը չի հանգստանա, նա վախեցած է»: Գործով անցնող 7 ամբաստայալներից ամենամեղմ պատիժը ստացավ Հովհաննես Պետրոսյանը՝ դատապարտվելով 2 տարվա ազատազրկման: «Միայն Հովհաննեսի ցուցմունքների հիման վրա այսքան մարդ հայտնվեց անազատության մեջ եւ այսքան մարդու պատիժ նշանակվեց: Հովհաննեսը շատ կարճ ժամանակում կհայտնվի ազատության մեջ: Պատվերը կատարեց, շատ հանգիստ կարող է զբոսնել քաղաքում»,- ասաց պաշտպաններից Նինա Կարապետյանցը:
