Դասախոսներին ազատել են աշխատանքից
Շիրակի պետական համալսարանի դասախոս Գագիկ Համբարյանն ազատվել է աշխատանքից: Այդ մասին պատմության եւ փիլիսոփայության ամբիոնի դասախոսը գրել է ֆեյսբուքյան իր էջում եւ հայտնել, որ իր հետ լուծվել է աշխատանքային պայմանագիրը: Համալսարանի ռեկտոր Սահակ Մինասյանի հրամանով բուհի պատմության եւ փիլիսոփայության ամբիոնի վարիչի ժամանակավոր պաշտոնակատարի եւ ամբիոնի դոցենտի պաշտոններից ազատվել է նաեւ Հովհաննես Խորիկյանը: Հիշեցնենք, որ ՇՊՀ դասախոսներ Գագիկ Համբարյանն ու Հովհաննես Խորիկյանը պարբերաբար բարձրաձայնում էին Շիրակի պետական համալսարանում ֆինանսական չարաշահումների մասին եւ անվստահություն հայտնում ռեկտոր Սահակ Մինասյանին: Նշենք, որ վերջերս դասախոսները նամակ էին ուղարկել ՀՀ ԱԺ նախագահ Արա Բաբլոյանին և ՀՀ ԱԺ կրթության և գիտության հարցերով մշտական հանձնաժողովի նախագահ Վարդան Բոստանջյանին: Պատգամավորներից կազմված խումբը օրեր առաջ եղել էր Գյումրիում եւ հանդիպել նամակի հեղինակների, ինչպես նաեւ համալսարանի ղեկավարության հետ: Թե երբ է լինելու հանձնաժողովի կողմից վերջնական եզրակացությունը, Վարդան Բոստանջյանն այցից հետո նշել էր, որ իրավիճակը կներկայացվի ԱԺ խորհրդին. «Մոտ օրերս Էթիկայի հանձնաժողովի ընդլայնված նիստ կլինի, որին կմասնակցի նաև հոգաբարձուների խորհրդի նախագահը, կրթության և գիտության նախարարը, նաև մենք, և կփորձենք հարցերին վերջնական լուծում տալ»:
