2017-ին ինքնասպանության 10 դեպք է գրանցվել բանակում (տեսանյութ)
2017-ին Հայոց բանակում գրանցվել է մահվան 62 դեպք, ասում է իրավապաշտպան Արթուր Սաքունցը: «Այդ դեպքերի 45-50 տոկոսը հրադադարի ռեժիմի խախտման դեպքեր են, իսկ մնացած դեպքերը եղել են խաղաղ պայմաններում: Ընդ որում՝ ինքնասպանության 10 դեպք, իսկ ավտովթարներից գրանցվել է 8 մահացության դեպք»: Իրավապաշտպան Ժաննա Ալեքսանյանը հիշում է նորակոչիկ զինծառայող Էռնեստ Հովհաննիսյանին, որը հունվարի 18-ին իրեն ցած էր նետել զորամասի պատուհանից: «Էռնեստը շատ մեծ ուրախությամբ է գնացել ծառայության, նրա ծնողները չեն հավատում, որ տղան պատուհանից իրեն ցած է նետել»: Դեպքից հետո ՊՆ խոսնակը ֆեյսբուքյան գրառում էր արել, որ զինվորը ինքնախեղման փորձ է կատարել եւ այժմ քննություն է ընթանում: Բանակում ամենամեծ խնդիրն անպատժելիության, քրեական մթնոլորտի պահպանումն է,- ընդգծում են իրավապաշտպանները։ ՊՆ անձեռնմխելի կառույց չէ, առավել եւս հնդկական սուրբ կովի կարգավիճակում չէ, ասում է իրավապաշտպան Արթուր Սաքունցը: «Այն կենդանի օրգանիզմ է, կան ռեալ խնդիրներ, որոնք պետք է լուծվեն: Պետք է խնդիրների մասին բարձրաձայնել եւ պահանջել»: Զինակոչիկների առողջական վիճակի վերաբերյալ հարցը եւս խնդրահարույց է: Շատ են դեպքերը, երբ բանակ են գնում մի քանի հիվանդություններ ունեցող երիտասարդներ։ «Եթե 3 հիվանդություն ունի, երիտասարդը պիտի ճանաչվի ոչ պիտանի ծառայության համար : Բայց տանում են բանակ, դա ի՞նչ որակ կարող է ապահովել»: Իրավապաշտպաները վստահ են, եթե անպատժելիության մթնոլորտը վերանա, ապա բանակում շատ բան կփոխվի: Իսկ առայժմ ըստ նրանց՝ կայուն, շարունակական վատ վիճակ է։
