Կոռուպցիայի ահազանգ. արծվաշենցիները դոնորների տրամադրած 14,5 միլիոնի փոխարեն 360 հազար են ստացել
Արծվաշենցիները գոհ չեն Տարածքային կառավարման եւ զարգացման նախարար Դավիթ Լոքյանի պատասխանից: Գեղարքունիքի մարզ կատարած աշխատանքային այցի շրջանակներում նա հանդիպել էր նաեւ արծվաշենցիների հետ եւ հայտարարել՝ նրանց պահանջները չեն բավարարվելու: Արծվաշենցիները կրկին պահանջել են գույքային փոխհատուցում: «Ասել է՝ ինչ ուզում եք՝ արեք, ուզում եք՝ Բաղրամյանը փակեք, ոչինչ չի փոխվելու»,- «Ա1+»-ի հետ զրույցում ասաց բնակիչներից մեկը: Նա նաեւ փոխանցեց, որ իրենց տները նորոգելու համար առաջարկվել է 3-ից 5 տոկոսով վարկեր, սակայն հրաժարվել են: Արծվաշենցին նաեւ փոխանցեց, որ 2012 թ միջազգային դոնոր կազմակերպությունը 6 մլրդ 960 մլ դրամ գումար է փոխանցել, ինչի արդյունքում յուրաքանչյուր ընտանիք 14 մլն 500 հազար դրամ պետք է ստանար, սակայն իրենց տրամադրվել է միայն 360 հազար դրամ: Միայն Ճամբարակ քաղաքում 420 արծվաշենցի ընտանիք է ապրում եւ նրանց տները վթարային են: Հենց փոխհատուցման պահանջով դեկտեմբերի 5-ին արծվաշենցիները բողոքի ակցիա անցկացրին նախագահական նստավայրի դիմաց: Նրանք վստահեցրին, որ իրենց ակցիաները շարունակվելու են այնքան ժամանակ, մինչեւ պահանջները բավարարվեն:
