Մեր շախմատիստները զիջում են իրենց դիրքերը
Հայաստանի շախմատիստները բավական անհաջող հանդես եկան Մինսկում ընթացող Եվրոպայի շախմատի տղամարդկանց անհատական առաջնության 8-րդ տուրում: Մրցաշարի առաջատարներին հետապնդող Հրանտ Մելքումյանը կրկին պարտություն կրեց եւ էլ ավելի զիջեց իր դիրքերը: Արման Միքայելյանը, որը 5,5 միավորով կիսում էր 3-13-րդ հորիզոնականները, ոչ-ոքի ավարտեց իր պարտիան եւ արդեն մեկ բալով ետ է մնում առաջնության միանձնյա առաջատար Դեյվիդ Հոուելից: Այս տուրում մեր ներկայացուցիչներից հաղթանակներ տարան ներքեւի հորիզոնականներում գտնվող շախմատիստները: Առաջնության մրցանակային տեղերի համար այժմ պայքարում են 55 շախմատիստ: Նրանց թվում են նաեւ մեր չորս պատվիրակները՝ Արման Միքայելյանը, Սերգեյ Մովսեսյանը, Արման Փաշիկյանը եւ Վահե Բաղդասարյանը, սակայն նրանք պետք է անպայման հաղթանակներ տանեն մնացած երեք տուրերում:
