Ժիրայր Սեֆիլյանի գործով կալանավորվածը դադարեցրել է հացադուլը
«100-ամյակն առանց ռեժիմի» շարժման առաջնորդ Ժիրայր Սեֆիլյանի գործով կալանավորված եւ 30 օր հացադուլի մեջ գտնվող Ներսես Պողոսյանը դադարեցրել է բողոքի ծայրահեղ միջոցը։ Սակայն սա չի նշանակում, որ Ներսես Պողոսյանը հրաժարվում է իր պահանջներից։ Արդեն 7 ամիս կալանավայրում գտնվող Ներսես Պողոսյանը պահանջում է փոխել իր խափանման միջոցը՝ կիրառելով ստորագրություն կամ գրավ: «Երեկ «Նուբարաշեն»-ում նրան տեսակցել է մայրը եւ շատ խնդրել դադարեցնել հացադուլը, քանի որ շատ էր թուլացել։ Ներսեսն էլ չի մերժել մոր խնդրանքը»,- այս մասին «Ա1+»-ին հայտնեց Ներսես Պողոսյանի կինը՝ Լիա Պողոսյանը։ Նա մեղադրվում է կազմակերպված խմբում լինելու համար, սակայն քննչական մարմինը, ըստ պաշտպանի, որոշում է կայացրել , որ Ներսեսը չի անդամակցել որեւէ խմբի, հրաժարվել է հանցանք կատարելուց: