Ավելի կարեւոր է, թե ով կլինի Թրամփի օգնականը. Արա Պապյան (տեսանյութ)
ԱՄՆ ընտրություններից հետո նախագահ ընտրված Դոնալդ Թրամփի ղեկավարմամբ աշխարհը փոխվելու է. «Դեպի լավը, թե վատը, պետք է սպասել: Բայց ես լիահույս եմ, որ Հայաստանի առումով դեպի լավը: Թամփը մի քիչ անկանխատեսելի է, դրա մեջ հնարավոր է նաեւ հետաքրքիր զարգացումներ մեզ համար»,-այսօր լրագրողների հետ հանդիպման ժամանակ ասաց «Մոդուս Վիվենդի» կենտրոնի ղեկավար,քաղաքագետ Արա Պապյանը: Նրա խոսքերով՝ այս պահին հրատապ եւ կարեւոր չէ Հայոց ցեղասպանության ճանաչումը, այս պահին ավելի կարեւոր է ճանաչումից անցնել փոխհատուցումների: Քաղաքագետը չի կարծում, որ ԼՂՀ-ի հարցում հայ-ամերիկյան հարաբերությունները փոփոխության կենթարկվեն, քանի որ որոշակի կայուն գիծը պահպանվելու է. « ԱՄՆ-ն եռանախագահներից մեկն է լինելու եւ փորձեր կանի նախաձեռնություններով հանդես գալ: Չնայած Թրամփն ինքն է խոստովանել, որ տեղյակ չէ Արցախի, Ղարաբաղյան հակամարտության հարցերից: Այս պահին ավելի կարեւոր է, թե ով կլինի Թրամփի օգնականը եւ կսովորեցնի ինչպես աշխատել»: Բակո Սահակյանի շնորհավորանքն էլ, ըստ Արա Պապյանի, որեւէ դեր չի խաղա, դա կդիտվի որպես մասնավոր շնորհավորանք, այլ ոչ թե պետական: Իսկ Ռուսաստանի ոգեւորությունը Դոնալդ Թրամփի ընտրվելու հետ կապված կապում է նրա հետ, որ հույսեր են կապում, թե ԱՄՆ նախագահը պատժամիջոցները կդադարեցնի: Անդրադառնալով Ադրբեջանի կողմից անցկացվելիք զորավարժություններին, «Մոդուս Վիվենդի» կենտրոնի ղեկավարը այն մտահոգիչ համարեց՝ նշելով, որ այս կերպ փորձում են ուժային մեթոդներով խնդիրներ լուծել. «Սակայն Ադրբեջանը չի կարող»,- ավելացրեց Արա Պապյանը: Մանրամասները՝ տեսանյութում
