«Պարոն Մարուքյանն իր քաղաքական ապագան լուրջ վտանգի տակ է դնում»
ԱԺ փոխնախագահ Էդուարդ Շարմազանովը քիչ առաջ «Ազատություն» ՌԿ եթերում իր զարմանքն ու հիասթափությունը հայտնեց Վանաձորում ավագանու նիստում տեղի ունեցողի առնչությամբ, որտեղ «Լուսավոր Հայաստան» կուսակցության ղեկավար Էդմոն Մարուքյանը կոչ է անում բաց քվեարկել. «Պարոն Մարուքյանն իր կուսակիցների վրա վստահ չէ՞, որ ասում է բաց քվեարկեք»։ Հիշեցնենք, այստեղ ավագանին պետք է ընտրի քաղաքապետ։ 2 օր առաջ «Հայկական վերածնունդը» ԲՀԿ-ի ու «Լուսավոր Հայաստանի» հետ համաձայնության հուշագիր է ստորագրել՝ աջակցություն հայտնելով ԼՀԿ թեկնածու Քրիստ Մարուքյանին։ Էդուարդ Շարմազանովը շեշտում է՝ բաց քվեարկությունը օրենքի խախտում է. «Ես զարմացած եմ որոշ պատգամավորների պահվածքից ու նման կրկեսային խեղկատակություններից։ Երբ հարցը իրենց է վերաբերում, ավելի կոպտագույն են խախտում օրենքը, քան 90-ականներին»։ «Պարոն Մարուքյանը նման քայլով իր քաղաքական ապագան լուրջ վտանգի տակ է դնում»,- եզրափակում է Էդուարդ Շարմազանովը։ Այս առնչությամբ ՀՀԿ փոխնախագահ Արմեն Աշոտյանը ֆեյսբուքում գրել է. Անկախ Վանաձորի քաղաքապետի ընտրությունների արդյունքից ակնհայտ է, որ՝ 1. ՀՀ ԱԺ պատգամավորների նման շահագրգիռ և ակտիվ մասնակցությունը ուղղակի միջամտությոան և պրոտեկցիայի տարրեր է պարունակում: 2. ՀՀ օրենքները պետք է հարգվեն բոլորի կողմից, անկախ ընթացիկ քաղաքական շահից:
