Հայաստանում մոտոսպորտով զբաղվողները լուրջ խնդիրներ ունեն (տեսանյութ)
«Մոտոսպորտով զբաղվողների թիվը հանրապետությունում տարեցտարի ավելանում է, սակայն մեր մարզիկներն առայժմ լուրջ նվաճումների չեն հասնում միջազգային խոշոր մրցաշարերում, քանի որ տեխնիկայի լուրջ պակաս ունեն: Շատերը դեռեւս հանդես են գալիս 1984 թվականի արտադրության «Չեզետ» մակնիշի մոտոցիկլետներով, որոնք իրենց պարզապես սպառել են: Ճիշտ է, մի քանիսն իրենց միջոցներով ձեռք են բերել ճապոնական մոտոցիկլետներ, բայց դա շատ քիչ է հաջողության հասնելու համար», - «Ա1+»-ի մարզական լրագրողին ասաց «Արվիկոն» ավտոմոտոակումբի նախագահ Արսեն Սարգիսովը: Հենց այս ակումբի ջանքերով եւ Երեւանի քաղաքապետարանի հովանավորությամբ վերջին տարիներին տեղի են ունենում Հայաստանի մոտոկրոսի առաջնությունները: «Հայաստանում գրանցված է մոտոսպորտի ֆեդերացիա, սակայն այն, ավաղ, որեւէ մրցավազք չի կազմակերպում: Մենք էլ չէինք կարող դա անել, եթե Երեւանի քաղաքապետարանը չաջակցեր մեր ակումբին եւ չտրամադրեր Ծեծեռնակաբերդի խճուղու մոտ գտնվող տարածքը, որտեղ ավելի հարմար է մարզումներ անցկացնել, քան նախկին Սովետաշենում գտնվող նման մրցուղում», - ասաց փորձառու մասնագետը: