«Անալիտիկ»-ի տնօրենի կալանքի ժամկետը երկարացվեց
Երեւանի Արաբկիր եւ Քանաքեռ Զեյթուն վարչական շրջանների ընդհանուր իրավասության դատարանի դատավոր Դավիթ Գրիգորյանը բավարարեց նախաքննական մարմնի միջնորդությունը եւ երկու ամսով երկարացրեց «Անալիտիկ» կայքի տնօրեն Անի Հովհաննիսյանի կալանքի ժամկետը: Ինչպես «Ա1+»-ի հետ զրույցում նշեց պաշտպան Լիպարիտ Սիմոնյանը, նա միջնորդություն էր ներկայացրել նաեւ խափանման միջոցը՝ գրավով փոխարինելու մասին, սակայն դատարանը մերժել է միջնորդությունը: Պաշտպանական կողմը պատրաստվում է Վերաքննիչ բողոք ներկայացնել: Անի Հովհաննիսյանին մեղադրանք է առաջադրվել մի խումբ անձանց կողմից նախնական համաձայնությամբ շորթում հոդվածով: Հոդվածը նախատեսում է 3-7 տարվա ազատազրկում: Հիշեցնենք, որ ԱԺ պատգամավոր Տիգրան Ուրիխանյանը հաղորդում է տվել այն մասին, որ «analitik.am» լրատվական կայքի տնօրենը կայքում պարբերաբար իր անձի, ընտանիքի անդամների, ինչպես նաև իր` որպես ԱԺ պատգամավորի գործունեությանը վերաբերող սուտ տեղեկատվություններ, զրպարտություններ և վարկաբեկիչ այլ նյութեր հրապարակելու կապակցությամբ հանդիպումներ է ունեցել իր հետ, և նմանօրինակ հրապարակումները չդադարեցնելու ու հետագայում նույնաբովանդակ այլ հոդվածներ հրապարակելու սպառնալիքով՝ իրենից պահանջել է յուրաքանչյուր ամիս վճարել 300 հազ. ՀՀ դրամ: Անի Հովհաննիսյանը չի ընդունում իրեն առաջադրված մեղադրանքը:
