Քաղաքացիները մտքում կկրկնեն իրենց երազանքներն էկումենիկ աղոթքի ժամին (տեսանյութ)
Հանրապետության հրապարակում նախապատրաստական աշխատանքներ են ընթանում՝ դիմավորելու Հռոմի Պապին։ Հրապարակ են մտնում ամենաանհամբեր քաղաքացիները, որ ցանկանում են առաջին շարքերում լինել։
Թեև միջոցառման մեկնարկին դեռ մեկ ժամ կա, սակայն բեմի մոտ է հավաքվել հայկական քաղաքական ամբողջ էլիտան՝ թե իշխանական, թե ընդդիմադիր թևերից։ Ի դեպ, քաղաքացիների մուտքը հրապարակ թույլատրված է շատրվանների կողմից, իսկ քաղաքական գործիչները և լրագրողները հրապարակ մտան Մյասնիկյանի արձանի կողմից։ «Ա1+»-ին հաջողվեց զրուցել Երևանի քաղաքապետ Տարոն Մարգարյանի հետ. ինչ զգացողություններ է ունեցել Պապին դիմավորելից, և ըստ նրա՝ ինչ կտա Հռոմի Պապի այցը։ Տարոն Մարգարյանը նշեց, որ Հռոմի Պապի ձեռքը սեղմելիս մեծ հպարտության զգացողություն է ունեցել և կարծում է, որ նրա այցը միայն խաղաղություն կբերի իր հետ։
Խաղաղության հույսով են նաև ՀՀԿ պատգամավոր Կարինե Աճեմյանը, ՀԱԿ խմբակցության ղեկավար Լևոն Զուրաբյանը։ Վերջինս ավելացրեց, որ ցանկանում է Պապի ուղերձները վարակիչ լինեն ինչպես մեր իշխանությունների, այնպես էլ մեր հարևան պետությունների համար։
Ինչ վերաբերում է մեր համաքաղաքացիներին, ապա նրանցից յուրաքանչյուրը հրապարակ է եկել կոնկրետ նպատակով ու երազանքով, ինչի մասին չբարձրաձայնեցին, որպեսզի աղոթքի ժամանակ կրկնեն իրենց մտքերը, որոնք իրականություն կդառնան։
Հանրապետության հրապարակում իրավապահ մարմինների կողմից հսկողությունը շատ խիստ է։
Մարդիկ ծածանում են ՀՀ և Վատիկանի դրոշները։
