Արարատյան Հայրապետական առաջնորդարանում այսօր տեղի ունեցավ «Կախվածություն ունեցողներին հոգեւոր աջակցություն» խորագրով սեմինարը, որը հասցեագրված էր ալկոհոլից, թմրանյութերից կախվածություն ունեցող մարդկանց, ովքեր ցանկանում են ելք գտնել ստեղծված իրավիճակից: Սեմինարը վարում էր Քրիստոնեական հասարակական բարեգործական՝ «Հին աշխարհ» հիմնադրամի վարչության նախագահ, վերականգնողական ծրագրերի տնօրեն, հոգեբան Եվգենի Պրոցենկոն: Վերջինս խոսեց թմրանյութերից եւ ալկոհոլից կախվածության եւ չարաշահման տարբերության մասին: Ըստ նրա՝ դրանք միանգամայն տարբեր բաներ են: «Կախվածության խնդիրների մասին խոսելիս հաճախ մոռանում են չարաշահման մասին: Շատերին թվում է, որ եթե մարդը անընդհատ ալկոհոլ կամ թմրանյութ է օգտագործում, ապա դա կախվածություն է, սակայն միշտ չէ, որ այդպես է: Դա կարող է պարզապես լինել չարաշահում, որը ինչ-որ մի օր կարող է դադարել, եւ մարդը չի էլ հասկանա, թե ինչպես դա եղավ»: Եվգենի Պրոցենկոն Հայաստանում է ԱՀԹ Զորավոր Ս. Աստվածածին եկեղեցու հոգեւոր հովիվ, ԱԹՀ Ցերեկային կենտրոնի տնօրեն Տ. Գրիգոր քահանա Գրիգորյանի հրավերով: Վերջինս լրագրողների հետ զրույցում նշեց, որ նման փորձի փոխանակումն անհրաժեշտ է կախվածություն ունեցող անձանց հետ տարվող աշխատանքներում: «Արդեն չորս տարուց ավել է, ինչ ցերեկային կենտրոնը զբաղվում է թմրամոլներով եւ ՄԻԱՎ վարակակիրներով: Թմրամոլների հետ կապված հիմնական խնդիրը կախվածությունից ազատվելն է, որ նրանք կարողանան ուժ գտնել դա հաղթահարելու: Նրանք տարբեր բնագավառների, մասնագիտությունների, սոցիալական խավի մարդիկ են, որոնցից ամեն մեկին յուրահաուկ մոտեցում պետք է ցուցաբերվի»,-ասաց նա: Քահանան ցավով նշում է, որ հասարակությունը դեռ պատրաստ չէ ընդունել նման մարդկանց. «Ցավոք, խարան-խտրականությունը կա, եւ հասարակությունն այսօր պատրաստ չէ ընդունել թմրամոլներին: Աշխատանք է տարվում նաեւ նրանց ընտանիքի անդամների, հարազատների հետ, որովհետեւ ընտանիքի անդամները չեն գիտակցում, որ իրենք էլ են հիվանդ, եթե ընտանիքում ունեն թմրամոլ, եւ սկզբում պետք է աշխատանք տանել նրանց հետ, որպեսզի իրենք վերագտնեն իրենց եւ կարողանան օգնել իրենց հարազատին»: