Լեւոն Արոնյանը գեղեցիկ ոճով հաղթեց Մագնուս Կառլսենին
Շախմատի Հայաստանի տղամարդկանց հավաքականը երկրորդ հաղթանակը տարավ Իսլանդիայում շարունակվող Եվրոպայի թիմային առաջնությունում: Այսօր մեր ընտրանին հանդիպեց Նորվեգիայի ազգային թիմի հետ, որը հանդես եկավ աշխարհի չեմպիոն Մագնուս Կառլսենի գլխավորությամբ: Չնայած այդ հանգամանքին, Հայաստանի հավաքականը հաղթեց 2,5:1,5 հաշվով: Նախ Հրանտ Մելքումյանը սպիտակներով առավելության հասավ միջազգային վարպետ Ֆրոդե Ուրկեդալի նկատմամբ, ապա Լեւոն Արոնյանը սեւերով գեղեցիկ ոճով հաղթեց Մագնուս Կառլսենին: Գաբրիել Սարգսյանը ոչ-ոքի խաղաց գրոսմայստեր Ջոն Լյուդվիգ Համերի հետ, իսկ Սերգեյ Մովսիսյանը պարտվեց ՄՎ Արյան Տարիին: Այդպիսով, Հայաստանի հավաքականը վաստակեց 4 միավոր եւ կրկին միացավ առաջատարներին հետապնդողների խմբին՝ լիովին վերադարձնելով իր պարտքը հայ շախմատասերներին երեկ Ֆրանսիայից կրած ցավալի պարտության համար: Մրցաշարային աղյուսակն առայժմ գլխավորում են Ուկրաինան ու Ռուսաստանը, որոնք տարել են երեք հաղթանակ եւ ունեն 6-ական միավոր:
