Ներկրվել է շուրջ 3000 տոննա հոլանդական կարտոֆիլի տնկանյութ
ՀՀ գյուղատնտեսության նախարար Սերգո Կարապետյանը և Հայաստանի ագրարագյուղացիական միավորման նախագահ Հրաչ Բերբերյանն այսօր այցելել են Կոտայքի մարզում գտնվող «Ֆիրմա Նյու» մաքսային տերմինալ` Հայաստանի ագրարագյուղացիական միավորման կողմից ՀՀ գյուղատնտեսության նախարարության աջակցությամբ ներկրված հոլանդական կարտոֆիլի տնկանյութը դիտարկելու նպատակով:
«Սա Նիդերլանդներից Հայաստան ներկրված Սիլվանա սորտի կարտոֆիլի սերմացուի վերջին խմբաքանակն է, որը մեկ հեկտարից մինչև 80 տոննա բերքատվություն է ապահովում: Ըստ կանխատեսումների կարտոֆիլի ցանքատարածությունները ընթացիկ տարում 1000-1200 հեկտարով կավելանան, համապատասխանաբար կավելանա նաև համախառն բերքը»,- իր խոսքում նշել է ՀՀ գյուղատնտեսության նախարար Սերգո Կարապետյանը:
Նախարարը հավելել է, որ ի հաշիվ ներկրվող տնկանյութի բարձր բերքատվության` 2010 թվականի համեմատությամբ կարտոֆիլի ցանքատարածություններն ընդհանուր առմամբ ավելացել են 12%-ով, իսկ համախառն բերքը` 40-50%-ով: Արդյունքում հաջողվել է վերջին 3-4 տարիների ընթացքում բավարարել ինչպես հանրապետության ներքին պահանջարկը, այնպես էլ մեծաքանակ արտահանումներ իրականացնել:
Նախարարի խոսքով` այս տարի նախորդ տարվա համեմատությամբ ավելի շատ տնկանույթ է ներկրվել` շուրջ 3000 տոննա. հանրապետությունում տարեկան ընդհանուր առմամբ օգտագործվում է 100-120 000 տոննա կարտոֆիլի սերմացու:
Իր հերթին Հրաչ Բերբերյանը նշել է, որ հանրապետությունում կարտոֆիլագործությունն արտահանման միտում ունեցող ճյուղ է և արտաքին շուկայում մեծ պահանջարկ ունի, ուստի նախարարության հետ համատեղ այժմ քննարկվում են ինտենսիվ` բարձր բերքատու կարտոֆիլագործությունը զարգացնելու լրացուցիչ ծրագրեր:
ՀՀ գյուղատնտեսության նախարարության տեղեկատվության և
հասարակայնության հետ կապերի բաժին
