Հայկ Մարությանի ահազանգը. Մի քանի խուլիգաններ հարձակվել են «Ազգային առաջընթաց» խմբակցության անդամների վրա

Երևանի նախկին քաղաքապետ, ավագանու «Ազգային առաջընթաց» խմբակցության նախկին անդամ Հայկ Մարությանն ահազանգում է.

«Այսօր մի քանի խուլիգաններ հանրային վայրում հարձակվել են Երևանի ավագանու «Ազգային առաջընթաց» խմբակցության անդամների վրա, որոնք իրենց քաղաքացիական դիրքորոշումն էին արտահայտում  Երևանի կանաչ ֆոնդի ոչնչացմանը միտված՝ ՔՊ իշխանության քաղաքականության հանդեպ։

Ներկայումս ոստիկանությունը, իրական հանցագործների փոխարեն, ձերբակալված է պահում «Ազգային առաջընթաց» մեր խմբակցության անդամներ Ռոբերտ Ծովյանին և Հայկ Գրիգորյանին։

Իշխանության որդեգրած՝ քաղաքական հալածանքների այս գործելաոճը պայմանավորված է բացառապես նրանց  ստեղծված թայֆայական համերաշխության և անպատժելիության մթնոլորտով։

Իրավապաշտպան կազմակերպություններին հորդորում ենք համապատասխան գնահատական տալ իշխանության կամայականություններին»։