Սպան զինվորին չպետք է ճորտ ընկալի․ հոգեբան (տեսանյութ)
Աջակցիր «Ա1+»-ին«Ես մեր զինվորի ցավը տանեմ»,- հոգեբան Սամվել Խուդոյանը՝ մեքենաների վրա փակցված այս բովանդակությամբ գրություններին նայում է մասնագիտական տեսանկյունից։ Այդ, ըստ նրա, ցույց է տալիս բանակի հանդեպ հանրության վերաբերմունքը։
«Բանակը աստվածացված է մեր հասարակության մեջ և սրբություն է համարվում»,- ասում է հոգեբանը։
Ըստ նրա՝ զինվորի պաշտամունքը ժողովրդի մեջ ակնհայտորեն կա և միշտ էլ կլինի․ «Կարծում եմ՝ սա բանակին ոգևորող շատ հզոր հանգամանք է։ Զինվորի ոգին պատերազմի ժամանակ ամենակարևորն է»։
Սամվել Խուդոյանի գնահատմամբ՝ բանակի հեղինակությունը վերջին երկու տարում բարձրացել է մի քանի հանգամանքների շնորհիվ։ Դրանցից մեկն այն է, որ հանրությունը էլ չի խոսում այն մասին , որ բարձաստիճան պաշտոնյաների որդիները բանակ չեն գնում։
« Վարչապետ լավ օրինակ ցույց տվեց, որ իր տղան գնացել և ծառայում է բանակում , այսինքն սրանից հետո ոչ մի բարձրաստիճան պաշտոնյայի որդի չի համարձակվի մտածել չծառայելու մասին»,- ասում է հոգեբանը։
Նա մի քանի այլ փոփոխություն էլ է արձանագրել բանակում հեղափոխությունից հետո՝ ներառյալ սննդի եւ հագուստի որակի լավացումը։
Հոգեբանը ընդգծում է, որ նոր զենքերի գնումը եւս հոյակապ ազդեցություն է ունեցել և բանակի , և հասարակության վրա։ Սամվել Խուդոյանի խոսքով՝ այս ամենը ցույց տվեց, որ նոր իշխանությունները գնում են բանակի հզորացման , Արցախը չհանձնելու և զիջումների չգնալու ճանապարհով։
«Հետհեղափոխական շրջանում զիվոր-սպա հարաբերություններում էլ դրական շարժ կա։ Սակայն ուզում եմ ընդգծել, որ պետք է փոխվի և զինվորի, և սպայի հոգեբանությունը։ Սպան պետք է այլ կերպ ընկալի զինվորին՝ ոչ թե որոշների պես որպես ճորտ, ենթակա, ստրուկ, ով պետք է անվերապահ կատարի նրա ասածները»,- շեշտում է նա։
Ինչ վերաբերում է բանակային ագրեսիային, ըստ հոգեբանի՝ սա արագ լուծվող հարց չէ․ «Բանակը շատ բարդ կառույց է, երիտասարդներ են, որոնց մոտ ագրեսիան բարձր մակարդակի է»։
Սամվել Խուդոյանը կարծում է, որ բանակում աղջիկները պետք է լինեն, և այս հանգամանքը կզսպի տղաների ագրեսիան, ինչպես նաեւ նրանց ներկայությունը կոգեւորի տղաներին ։
