Կրասնոյարսկի երկրամասում հինգ ամբարտակ է փլուզվել. կան զոհեր
Աջակցիր «Ա1+»-ինԿրասնոյարսկի երկրամասի Կուրագինյան շրջանում ջրի բեկման հետեւանքով հինգ ամբարտակ է ավերվել, այս մասին ըստ «Նովոստի-Արմենիա»-ի հայտնել է ՌԴ Քննչական կոմիտեն:
«Պարզվել է, որ ամբարտակները կառուցված են ապօրինի, առանց որեւէ թույլտվության ՝ ոսկու արդյունահանման հատվածում գրունտային ջրերի հեռացման նպատակով ։ Ճեղքը սկսվել է ամենավերեւից, իսկ հետո շղթայական, ջրի հզոր հոսքի պատճառով փլուզվել է եւս չորս հիդրոտեխնիկական կառույց»,-ճշտվում է գերատեսչության կայքում:
Քննչականի տվյալներով ՝ լեռնագործը, որի պարտականությունների մեջ էին մտնում տեղամասում աշխատանքների կազմակերպումն ու իրականացումը, ոչ մի հատուկ կրթություն չունի: Ընդ որում, տեղամասի պետը հայտարարել է, որ գիտակցել Է հեղեղման գոտում աշխատանքային ավանի կառուցման վտանգը:
Արտակարգ պատահարը տեղի է ունեցել շաբաթ առավոտյան ՝ Շչետինկինո ավանի շրջանում, ոսկու արդյունահանող տեխնոլոգիական ջրամբարում: Ամբարտակի խորտակման հետեւանքով ջրասույզ է եղել ավելի քան երկու հանրակացարան։ 15 մարդ մահացել է, 14-ը հոսպիտալացվել են:
Հինգ աշխատողների ճակատագիրն անհայտ է մնում։ Դեպքի վայրում շարունակում են աշխատել փրկարարները։
Ըստ քննչական կոմիտեի տեղեկատվության ՝ ջրի բեկման պատճառ կարող էին լինել ոսկու արդյունահանման ժամանակ եղած խախտումները։
Ինչպես հաղորդել են տեղական իշխանությունները, ամբարտակը պատկանում է «Սիբզոլոտո» հոլդինգին, որը ոչ մի տեղ գրանցված չէ:
Ոսկու արդյունահանման "Սիսիմ" ՍՊԸ տնօրենը, լեռնահատկացման տեղամասի պետն ու վարպետը ձերբակալվել են:
Քննչականը քրեական գործ է հարուցել:
Երկուշաբթի ՝ հոկտեմբերի 21-ին, Կրասնոյարսկի երկրամասում սգո օր է հայտարարվել ։